یہی دل رفتگی، دل کی لگی ہے
افتخار راغبؔ
یہی دل رفتگی، دل کی لگی ہے
بلا کا لطف بھی ہے درد بھی ہے
…
تو کیا اے دل محبت کے لغت میں
نہیں اور ہاں کا مطلب ایک ہی ہے
…
فلک پر قلب کے اک بدرِ بے داغ
دیارِ فکر میں تابندگی ہے
…
عیاں پیکر بہ پیکر عکس بر عکس
محبت روشنی ہی روشنی ہے
…
کہو جو کہہ رہا ہے دل تمھارا
سنو کیا دل کی دھڑکن کہہ رہی ہے
…
تری خاموش آنکھیں بولتی ہیں
ترے بے باک لب پر خامشی ہے
…
دریدہ جسم ہے اب آدمیت
پریشاں آدمی سے آدمی ہے
…
ہَوا ہے وہ، کہاں کچھ اُس کو پروا
ہَوا سے میری کیا وابستگی ہے
…
مری آنکھیں چمکتی ہی رہیں گی
حسیں لب پر ترے جب تک ہنسی ہے
…
نہیں ہے دشمنی میری کسی سے
کہو کس سے تمھاری دوستی ہے
…
کہاں جاؤں میں پیاسا ہنس راغبؔ
وہ ہے تالاب، میری زندگی ہے
تبصرے بند ہیں۔