محمد سلیمان دہلوی کو منظوم خراجِ تحسین
افتخار راغبؔ
(انڈو قطر اردو مرکز کے بانی صدر و قطر میں عالمی مشاعروں کے سلسلے کا آغاز کرنے والے ادب نواز و ادیب محترم محمد سلیمان دہلوی صاحب کو منظوم خراجِ تحسین)
اہل زباں کی شان سلیمان دہلوی
اردو کے پاسبان سلیمان دہلوی
…
جتنی گرفت ہے انھیں اپنی زبان پر
اُتنے ہیں خوش بیان سلیمان دہلوی
…
ہیں جسم و جانِ انڈو قطر اردو مرکز آپ
بزمِ ادب کی جان سلیمان دہلوی
…
لگتے ہیں یہ پچاس کے ستر کے بعد بھی
دل کے بھی نو جوان سلیمان دہلوی
…
اردو زبان و قوم کی بہبود کے لیے
غم گیں ہر ایک آن سلیمان دہلوی
…
روشن ہیں مثل شمس سرِ آسمانِ نثر
دھرتی پہ آسمان سلیمان دہلوی
…
اے وقت قدر کر کہ ترے دستِ ناز میں
ہیں مثلِ ارمغان سلیمان دہلوی
…
دوحہ قطر کو ناز بہت آں جناب پر
اردوستاں کی آن سلیمان دہلوی
…
رگ رگ میں خاکِ دہلی کی خوش بو رچی بسی
الفت کے ترجمان سلیمان دہلوی
…
دیتا ہے ان کو زیب کہ نازاں ہوں بخت پر
جن کے ہیں درمیان سلیمان دہلوی
…
اچھّائیوں کے ساتھ ہیں راغبؔ بصد خلوص
اچھّوں کے قدر دان سلیمان دہلوی
تبصرے بند ہیں۔