شجر کی گود خالی ہو گئی ہے

عتیق انظر

شجر  کی گود  خالی  ہو  گئی ہے
پریشاں ڈالی  ڈالی  ہو گئی ہے

ہوائیں رقص کرتی ہیں جنوں میں
بہار   گل    نرالی    ہو گئی  ہے

لہو  میں  تر بہ تر  ہے  فاختہ  کیوں
نظر  ہر  اک  سوالی  ہو گئی  ہے

امیر شہر  ہے  مسند  پہ  پھر بھی
ہر  اک  دیوار  کالی  ہو گئی  ہے

ابھرتا  ہی نہیں  ہے  چاند کوئی
نظر کھڑکی  کی  جالی  ہو گئی  ہے

ہنسی کے پھول سب میں بانٹتی ہے
وہ   بالکل   لا  ابالی  ہو  گئی  ہے

خدا  محفوظ  رکھے  نظر  بد  سے
غزل  میری  مثالی  ہو گئی  ہے

(مضامین ڈیسک)